04 Febbraio 2014, 18:01
1 min di lettura
CATANIA – Un nostro lettore ci ha inviato una poesia scritta per la Messa dell’Aurora, tra i momenti più intensi e suggestivi delle festività dedicate alla Santa Patrona.
Ancora nun è l’alba e dint”o Duomo
tanta gente ce sta
ca manco cchiù na spìngula ce trase,
e ancora, ‘a dint”e ccase,
iesceno, tutte chine ‘e devuzione,
fedele ‘nquantità.
‘A folla è tanta, overamente è tanta,
eppure, sti pperzone,
pare addeventano
n’anema sola
tant’è l’ardore, ‘a fede e ‘a passione
ca mettono p”a Santa.
E’ notte ancora, ma,
Catania, tutta quanta,
è nu ricamo ‘e luce tuorno tuorno,
è notte futa e pare miezuiuorno,
è vierno chino e pare già l’està
tant’è ‘o calore
ca ‘o popolo carnale,
‘e gente cchiù sincere,
mettono int”e pparole ‘e sti ppreghiere.
So’ viecchie, piccerille,
so’ femmene d’età, songo figliole,
è tuttuquanto ‘o mmeglio ‘e ‘sta città
ca parla cu’ Sant’Agata, ch”a chiamma…
e ognuno l’addimanna quacche cosa,
ognuno le suspira na prumessa,
le fa nu vuto… e prega… e prega… e ‘a cerca…
e comme ‘a Santa iesce ncopp”altare
è na schiuppata ‘e gioia… ‘e lacreme… d’ammore…
e tanno tanno,
‘a dint”e core ‘e tutte chesti gente,
sparisce ogni tristezza, ogni malanno,
ogni mumento scuro…
p’ogni fedele, p’ogni catanese,
ce penzarrà sant’Agata,
è sicuro!
Pubblicato il
04 Febbraio 2014, 18:01